سائمن ڈول نے پشاور اور کوئٹہ کے میچ کے دوران کہا تھا کہ بابراعظم ذاتی سنگ میل کے لیے سست ہو گئے تھے ، بابر کو سنچری کے وقت رن ریٹ کو کم کرنے کے بجائے باؤنڈریز تلاش کرنے پر توجہ دینی چاہیے تھی، بابراعظم کی اننگز اعداد و شمار کے لحاظ سے بہترین ہے لیکن انہیں ٹیم کیلئے کھیلنے کی ضرورت ہے۔
اس تبصرے کے بعد سائمن ڈول کو سوشل میڈیا صارفین کی جانب سے تنقید کا نشانہ بھی بنایا گیا جس کے بعد سائمن ٹوئٹر پر ٹرینڈ کرتے رہے۔
اب اس حوالے سے سائمن ڈول کی وضاحت میں ان کا کہنا تھا کہ میں چاہتا ہوں کہ بابراعظم دنیا کا بہترین پلیئر بنے اور ویرات کوہلی ، سٹیو اسمتھ، کین ولیمسن اور جو روٹ کو پیچھے چھوڑ دے۔
سائمن ڈول کے مطابق جب میں بابر سے متعلق بات کرتا ہوں تو میں اس کے ارادے کی بات کرتا ہوں، میں نے ایک سال پہلے یہ بھی کہا تھا کہ فیب فورکو بھول جاؤ میرے لیے بابر دنیا کا بہترین پلیئر ہے، وہ دنیا کا بہترین کھلاڑی تھا، جس طرح کا یہ ٹورنامنٹ ہے،میری رائےکے مطابق بابر کو غالب آنا چاہیے۔
سائمن ڈول نے کہا کہ بابر کو بولنگ اٹیک پر حاوی ہونا چاہیے، لیکن 120 یا 130 کے سٹرائیک ریٹ کے ساتھ نہیں، مجھے ان کی بیٹنگ اور ارادہ بہت پسند آیا، یہ میری رائے ہے، مجھے بابر کو کھیلتے دیکھنا پسند ہے، لیکن انہیں بولرز کو یہ واضح کرنا چاہیے میں پاکستان کا کپتان ہوں اور آپ کو مجھ سے خطرہ ہے ۔
واضح رہے کہ گلیڈی ایٹرز کے خلاف میچ میں بابراعظم نے 65 گیندوں پر 115 رنز کی اننگز کھیلی تھی تاہم وہ ٹیم کو میچ جتوانے میں ناکام رہے تھے۔
